ہیوسٹن: این ای ڈی یونیورسٹی کے سابق طلبہ کی تنظیم کے زیرِ اہتمام سالانہ عشائیہ 2026 کا شاندار انعقاد کیا گیا، جس میں پاکستانی کمیونٹی کی اہم شخصیات، کاروباری رہنماؤں اور این ای ڈی یونیورسٹی کے فارغ التحصیل افراد نے شرکت کی۔ تقریب میں باہمی روابط، کامیابیوں کے اعتراف اور تفریحی سرگرمیوں کے ذریعے ایک یادگار شام کا اہتمام کیا گیا۔
تقریب کی خاص بات پاکستان کے معروف اور لیجنڈری گلوکار عالمگیر کی خصوصی موسیقی کی پیشکش تھی، جنہوں نے اپنی دلکش آواز اور مقبول گیتوں سے حاضرین کو محظوظ کیا۔ ان کی پرفارمنس کو شرکاء نے بھرپور پذیرائی دی اور محفل میں موسیقی کے خوبصورت رنگ بکھر گئے۔

تقریب کے مہمانِ خصوصی اشرف حبیب اللہ تھے، جو کمپیوٹرز اینڈ اسٹرکچرز انکارپوریشن کے بانی، صدر اور چیف ایگزیکٹو افسر ہیں۔ جبکہ نک دھانانی، دھانانی پرائیویٹ ایکویٹی گروپ کے بانی، چیئرمین اور چیف ایگزیکٹو افسر، مہمانِ اعزاز کی حیثیت سے شریک ہوئے۔
یہ تقریب این ای ڈی یونیورسٹی کے وائس چانسلر کے اعزاز میں منعقدہ حالیہ ملاقات اور تعارفی نشست کی کامیابی کے بعد منعقد کی گئی۔ اس اجتماع کا بنیادی مقصد سابق طلبہ کے درمیان روابط کو فروغ دینا، ان کی پیشہ ورانہ کامیابیوں کو سراہنا اور پاکستانی کمیونٹی کو ایک مشترکہ پلیٹ فارم پر جمع کرنا تھا۔

سالانہ عشائیے نے ہیوسٹن میں مقیم این ای ڈی یونیورسٹی کے فارغ التحصیل افراد کو ایک دوسرے سے ملاقات، تجربات کے تبادلے اور اپنی مادرِ علمی سے وابستگی کے اظہار کا موقع فراہم کیا۔ تقریب میں پاکستانی ثقافت، موسیقی اور باہمی یکجہتی کا خوبصورت امتزاج دیکھنے میں آیا۔




