ہیوسٹن: قائداعظم فاؤنڈیشن ہیوسٹن کے زیرِ اہتمام واشنگٹن ڈی سی سے تعلق رکھنے والی جنوبی ایشیا امور کی معروف ماہر الزبتھ تھریلکیلڈ کے اعزاز میں جناح لائبریری میں ایک پروقار استقبالیہ تقریب کا انعقاد کیا گیا۔ تقریب میں قائداعظم محمد علی جناح کی شخصیت، سیاسی جدوجہد اور تاریخی ورثے کو اجاگر کرنے کے ساتھ قائداعظم فاؤنڈیشن کی علمی و تحقیقی سرگرمیوں پر بھی روشنی ڈالی گئی۔
تقریب سے خطاب کرتے ہوئے ڈاکٹر آصف قدیر نے قائداعظم محمد علی جناح کے تاریخی ورثے کو محفوظ رکھنے اور اسے نئی نسل تک منتقل کرنے کے لیے فاؤنڈیشن کی کوششوں کا ذکر کیا۔ انہوں نے بتایا کہ فاؤنڈیشن کی سرگرمیوں میں قائداعظم سے متعلق تاریخی واقعات، اہم دستاویزات اور علمی مواد کو محفوظ کرنا اور عوام و محققین تک پہنچانا شامل ہے۔
اس موقع پر الزبتھ تھریلکیلڈ نے ڈاکٹر آصف قدیر اور قائداعظم فاؤنڈیشن کا شکریہ ادا کرتے ہوئے کہا کہ ہیوسٹن آمد سے قبل انہیں اس بات کا اندازہ نہیں تھا کہ یہاں قائداعظم محمد علی جناح سے متعلق اتنا اہم علمی اور تاریخی ذخیرہ موجود ہے۔ انہوں نے جناح لائبریری کے دورے کو اپنے لیے ایک متاثر کن تجربہ قرار دیا۔
الزبتھ تھریلکیلڈ نے کہا کہ جناح لائبریری ہیوسٹن میں پاکستانی کمیونٹی کو پاکستان کی تاریخ اور قائداعظم کے تاریخی ورثے سے جوڑنے کے لیے ایک مؤثر علمی مرکز کا کردار ادا کر رہی ہے۔ ان کے مطابق قائداعظم محمد علی جناح ایک انتہائی اہم تاریخی شخصیت ہیں، تاہم ان کی زندگی، سیاسی جدوجہد اور اس دور کے تاریخی حالات کو بہتر طور پر سمجھنے کے لیے مزید تاریخی و تحقیقی وسائل کی ضرورت ہے۔
انہوں نے جناح لائبریری کے ذخیرے کو اس حوالے سے قابلِ قدر قرار دیتے ہوئے کہا کہ ایسے علمی مراکز تاریخ کے مطالعے کے ساتھ ساتھ نئی نسل کو اپنے تاریخی پس منظر سے روشناس کرانے میں بھی اہم کردار ادا کرتے ہیں۔
تقریب میں اس امر پر بھی زور دیا گیا کہ ہیوسٹن کی پاکستانی امریکی کمیونٹی اپنے تاریخی، علمی اور ثقافتی ورثے کے تحفظ اور فروغ کے لیے سرگرم عمل ہے۔ جناح لائبریری اور قائداعظم فاؤنڈیشن کی علمی و تحقیقی سرگرمیاں پاکستان کی تاریخ، قائداعظم کے افکار اور پاکستانی امریکی کمیونٹی کے درمیان علمی و ثقافتی روابط کو مضبوط بنانے میں اہم کردار ادا کر رہی ہیں۔
