ہیوسٹن: سعودی قومی دن کے موقع پر ہیوسٹن میں مملکت سعودی عرب کے قونصلیٹ جنرل کی جانب سے ایک پروقار استقبالیہ تقریب کا اہتمام کیا گیا، جس میں مختلف ممالک کے قونصلز، سفارتی نمائندگان، کمیونٹی رہنماؤں اور معزز مہمانوں نے شرکت کی۔
تقریب کی میزبانی ہیوسٹن میں سعودی عرب کی قونصل جنرل محترمہ وفا المرزوقی نے کی۔ انہوں نے مہمانوں کا پرتپاک خیرمقدم کیا اور سعودی قومی دن کی مناسبت سے خطاب کرتے ہوئے مملکت سعودی عرب کی قومی ترقی، ورثے اور عوامی اتحاد کی اہمیت کو اجاگر کیا۔
استقبالیہ کے دوران قونصل جنرل وفا المرزوقی نے دیگر قونصلز کے ہمراہ سعودی قومی دن کا کیک کاٹا، جس کے بعد شرکاء کو عشائیے میں مدعو کیا گیا۔ تقریب خوشگوار اور دوستانہ ماحول میں جاری رہی، جہاں سفارتی اور کمیونٹی نمائندگان کو باہمی ملاقات اور روابط کے فروغ کا موقع بھی ملا۔
اس موقع پر سعودی عرب اور امریکا کے درمیان دیرینہ شراکت داری اور مختلف شعبوں میں بڑھتے ہوئے باہمی روابط کو سراہا گیا۔ توانائی، کاروبار، تعلیم، ثقافت اور عوامی سطح پر روابط کو دونوں ممالک کے تعلقات کا اہم حصہ قرار دیا گیا۔
شرکاء نے قونصل جنرل وفا المرزوقی کے لیے ذمہ داریوں کی انجام دہی میں کامیابی اور نیک خواہشات کا اظہار کیا، جبکہ مملکت سعودی عرب، اس کی قیادت اور عوام کے لیے مزید ترقی، خوشحالی اور استحکام کی دعائیں بھی کی گئیں۔
تقریب میں اس عزم کا اظہار کیا گیا کہ سعودی عرب اور امریکا کے درمیان باہمی احترام، تعاون اور دوستی پر مبنی تعلقات کو مزید فروغ دینے کے لیے مشترکہ کوششیں جاری رکھی جائیں گی۔
