ہیوسٹن–کراچی سسٹر سٹی ایسوسی ایشن نے کمیونٹی ممبران کی جانب سے غیر معمولی دلچسپی کے پیشِ نظر ہیوسٹن افطار — میئر آف ہیوسٹن کے ساتھ 27ویں سالانہ رمضان ڈنر — کی رجسٹریشن کی تاریخ کا اعلان کر دیا ہے۔ایسوسی ایشن کے مطابق رجسٹریشن کا آغاز پیر، 16 فروری 2026 کو شام 6 بجے (سی ایس ٹی، ہیوسٹن ٹیکساس کے وقت کے مطابق) کیا جائے گا۔ رجسٹریشن سے متعلق مکمل تفصیلات اور باضابطہ لنک اسی وقت ایونٹ کی ویب سائٹ پر جاری کر دیا جائے گا۔
ایسوسی ایشن نے واضح کیا ہے کہ ہیوسٹن افطار میں شرکت کے لیے پیشگی رجسٹریشن لازمی ہوگی، جبکہ محدود نشستوں کے باعث رجسٹریشن پہلے آئیے، پہلے پائیے کی بنیاد پر کی جائے گی۔ہیوسٹن–کراچی سسٹر سٹی ایسوسی ایشن نے کمیونٹی ممبران کے صبر اور مسلسل دلچسپی پر ان کا شکریہ ادا کرتے ہوئے کہا کہ سالانہ افطار ہیوسٹن کے ثقافتی تنوع اور ماہِ رمضان کے دوران باہمی ہم آہنگی اور شمولیت کی خوبصورت روایت کی عکاسی کرتا ہے۔
منتظمین نے مزید کہا کہ وہ اس دیرینہ روایت میں مہمانوں کا خیرمقدم کرنے کے منتظر ہیں اور دلچسپی رکھنے والے افراد کو ہدایت کی کہ مزید اپ ڈیٹس کے لیے باضابطہ ویب سائٹ پر نظر رکھیں۔
