پاکستان فلڈز ریلیف اینڈ ری ہیبیلیٹیشن مہم 2025 کے سلسلے میں اس ہفتے 40 فٹ طویل امدادی کنٹینر پاکستان روانہ کیا گیا ہے۔ اس کنٹینر میں نئی سرمائی پوشاک، بستر کے سیٹ، کمبل، جیکٹس اور گھریلو ضروری سامان شامل ہے۔ یہ ترسیل ہیوسٹن کی معروف پاکستانی نژاد تنظیموں کی جانب سے 10 لاکھ ڈالر سے زائد مالیت کی مشترکہ انسانی ہمدردی کی کوشش کا اہم مرحلہ ہے۔یہ مہم الائنس فار ڈیزاسٹر ریلیف، ہیلپنگ ہینڈ فار ریلیف اینڈ ڈیولپمنٹ ۔ پاکستانی امریکن ایسوسی ایشن آف گریٹر ہیوسٹن ، ایسوسی ایشن آف فزیشنز آف پاکستانی ڈیسنٹ آف نارتھ امریکہ ، ساوتھ ٹیکساس چیپٹر اور ہیوسٹن-کراچی سسٹر سٹی ایسوسی ایشن کے تعاون سے چلائی جا رہی ہے۔
ان تنظیموں نے حال ہی میں ایک کامیاب فنڈریزننگ مہم مکمل کی جس میں 10 لاکھ ڈالر سے زائد کی مالی و امدادی اشیا جمع کی گئیں، جو پاکستان میں شدید سیلاب سے متاثرہ کمیونٹیز کے لیے وقف ہیں۔ تقریب کے مہمانِ خصوصی محمد آفتاب چوہدری، قونصل جنرل آف پاکستان (ہیوسٹن) تھے۔ انہوں نے ہیوسٹن کی کمیونٹی کے جذبے، یکجہتی اور پاکستان کے ساتھ کھڑے ہونے کے عزم کو خراجِ تحسین پیش کیا۔ انہوں نے تمام شراکت دار تنظیموں کی کاوشوں کو سراہتے ہوئے کہا کہ ان کا مشترکہ مقصد انسانیت کی خدمت ہے۔تقریب کی نظامت محمد سعید شیخ نے کی، جو پاکستان الائنس آف فلڈز ریلیف اینڈ ری ہیبیلیٹیشن مہم 2025 کے کوآرڈینیٹر ہیں۔ انہوں نے تمام معزز مہمانوں، تنظیموں اور کمیونٹی کا مسلسل تعاون کرنے پر شکریہ ادا کیا۔
تقریب کے دوران ہیلپنگ ہینڈ فار ریلیف اینڈ ڈیولپمنٹ کے الیاس چوہدری اہم بریفنگ دیتے ہوئے بتایا کہ اب تک مشترکہ کوششوں سے تقریباً ایک لاکھ افراد کو ریلیف اور بحالی کی سہولیات فراہم کی جا چکی ہیں۔۔ مزید اظہارِ خیال کرنے والوں میں معیز خان ، سراج نارسی ، ڈاکٹر نوید ثاقب۔ ڈاکٹر یعقوب شیخ اور سعد انصاری شامل رہے ۔ تقریب کے آخر میں امدادی کنٹینر کی روانگی کا باضابطہ آغاز قونصل جنرل محمد آفتاب چوہدری نے ربن کاٹ کر کیا، جس میں کمیونٹی لیڈرشپ اور میڈیا نمائندگان بھی شامل تھے۔ میزبان تنظیموں نے ہیوسٹن کی مسلسل مدد کا شکریہ ادا کرتے ہوئے کہا کہ یہ کنٹینر پاکستان میں سیلاب متاثرین کی بحالی کے بڑے اور دیرپا منصوبے کا صرف ایک حصہ ہے۔ امدادی اشیا کی مزید ترسیل اور بحالی کے منصوبے پہلے ہی سے جاری ہیں۔
