پاکستان ایسوسی ایشن آف گریٹر ہیوسٹن کے تحت ایک شاندار تقریب کا انعقاد کیا گیا ہے جس میں ” کتاب اور چائے ” کے سلسلہ وار ادبی پروگرام میں شہرت یافتہ شاعرہ حمیرا رحمن کو خراج تحسین پیش کیا گیا۔ یہ تقریب ان کا تازہ شعری مجموعے ” بہت سے کام کرنے ہیں ” کی پذیرائی کے لیے منعقد کی گئی۔ نیویارک میں مقیم شاعرہ حمیرا رحمٰن اردو ادب میں ایک منفرد آواز کی حیثیت رکھتی ہیں۔ ان کی نئی کتاب میں شناخت، تعلق، اور انسانی جذبات جیسے موضوعات پر گہرے انداز میں روشنی ڈالی گئی ہے، جو نہ صرف اردو ادب کے قارئین بلکہ دیا پاکستانی کمیونٹی کے دلوں کو بھی چھو رہی ہے۔ تقریب میں مختلف مکاتب فکر سے تعلق رکھنے والے افراد، بشمول ادیبوں، دانشوروں، کمیونٹی رہنماؤں اور ادب دوستوں نے شرکت کی۔
شرکاء نے حمیرا رحمٰن کے کلام کو بے حد سراہا، اور ان کے اندازِ بیان کو فکری و جذباتی گہرائی کا حامل قرار دیا۔ تقریب سے خطاب کرتے ہوئے پاکستان ایسوسی ایشن آف گریٹر ہیوسٹن کے صدر جناب سراج نارسی نے نہ صرف شاعرہ کی خدمات کو سراہا بلکہ اردو ادب کے فروغ میں ادارے کے عزم کا بھی اظہار کیا۔
ان کا کہنا تھا کہ ادب ہمیں اپنی جڑوں سے جوڑے رکھتا ہے اور دنیا سے بامعنی مکالمے کا ذریعہ بنتا ہے ۔اس موقع پر معروف شاعر اور ادیب غصنفر ہاشمی نے بھی حمیرا رحمٰن کے فن کو خراجِ تحسین پیش کیا۔ انہوں نے کہا کہ ایسے تخلیقی افراد ہمارے ادبی منظرنامے میں نئی روح پھونکتے ہیں، اور ان کی حوصلہ افزائی ازحد ضروری ہے۔ مہمانوں نے شاعرہ کے اشعار پر تبصرے کیے۔ تقریب کی کامیابی اس بات کی غماز ہے کہ پاکستان ایسوسی ایشن آف گریٹر ہیوسٹن جیسے ادارے بیرونِ ملک ثقافتی شناخت کے فروغ میں ایک پُل کا کردار ادا کر رہے ہیں۔
