ہیوسٹن: اقوامِ متحدہ کی امریکی ایسوسی ایشن کے نیشنل لیڈرشپ سمٹ کا پہلی مرتبہ ہیوسٹن میں انعقاد کیا گیا، جس میں ملک بھر سے قومی رہنماؤں، مختلف چیپٹرز کے صدور اور سٹیزن ڈپلومیٹس نے بھرپور شرکت کی۔ تین روزہ سمٹ کی میزبانی ہیوسٹن سٹی کالج کے ویسٹ ہیوسٹن انسٹی ٹیوٹ نے کی۔
اس اہم قومی اجتماع کو پہلی بار ہیوسٹن لانے میں تعاون کرنے والے قومی رہنماؤں میں شامل شخصیات نے اسے اپنے لیے باعثِ اعزاز اور فخر قرار دیا۔
ٹیریسٹریلز یونائیٹڈ فار سٹیزن ڈپلومیسی کے عنوان سے منعقد ہونے والے اس سمٹ میں شہری سفارت کاری، بین الاقوامی تعاون، عالمی روابط اور مستقبل کی ٹیکنالوجی سمیت مختلف اہم موضوعات پر تبادلہ خیال کیا گیا۔

سمٹ کے تحت کیریئر کنیکشنز کا مقبول سیشن جدید سہولیات سے آراستہ اسماعیلی سینٹر ہیوسٹن میں منعقد ہوا، جبکہ اسپیس سینٹر ہیوسٹن کے تعاون سے خلائی تحقیق، سائنسی جدت اور ٹیکنالوجی کے مستقبل پر خصوصی اور انٹرایکٹو سیشنز کا اہتمام کیا گیا۔
اسی طرح ہیوسٹن کے قونصلر کور اور قومی رہنماؤں کے تعاون سے سفارتی مکالمے کے خصوصی سیشنز بھی منعقد ہوئے، جن میں بین الاقوامی تعلقات، عالمی تعاون اور عوامی سطح پر سفارتی روابط کے فروغ پر گفتگو کی گئی۔
اس تین روزہ سمٹ نے ہیوسٹن کی بین الاقوامی اہمیت، کثیرالثقافتی شناخت، عالمی روابط اور بین الاقوامی تعاون کے فروغ میں شہر کے نمایاں کردار کو بھرپور انداز میں اجاگر کیا۔ شرکاء نے مختلف شعبوں میں تجربات اور خیالات کے تبادلے کے ذریعے شہری سفارت کاری کو مزید مؤثر بنانے کے عزم کا اظہار کیا۔




