ہیوسٹن: این ای ڈی یونیورسٹی کے وائس چانسلر پروفیسر ڈاکٹر محمد طفیل کے اعزاز میں این ای ڈی ایلومنائی ایسوسی ایشن آف ہیوسٹن کے زیرِ اہتمام ایک خصوصی میٹ اینڈ گریٹ تقریب کا انعقاد کیا گیا، جس میں این ای ڈی یونیورسٹی کے سابق طلبہ، پاکستانی امریکن کمیونٹی اور مختلف شعبہ ہائے زندگی سے تعلق رکھنے والی شخصیات نے شرکت کی۔

تقریب کا انعقاد اور میزبانی گل زیب مرتضیٰ اور مرتضیٰ حسین خان نے نہایت خوبصورتی اور خوش اسلوبی سے کی۔ شرکاء نے وائس چانسلر پروفیسر ڈاکٹر محمد طفیل کا خیرمقدم کیا اور این ای ڈی یونیورسٹی کی تعلیمی، تحقیقی اور پیشہ ورانہ خدمات پر گفتگو کی۔
اس موقع پر این ای ڈی کے سابق طلبہ نے یونیورسٹی سے اپنی دیرینہ وابستگی کا اظہار کرتے ہوئے تعلیمی ادارے اور اس کے گریجویٹس کے درمیان مضبوط روابط کے فروغ کی اہمیت پر زور دیا۔ شرکاء نے این ای ڈی یونیورسٹی کی ترقی، طلبہ کی کامیابیوں اور مستقبل میں یونیورسٹی اور اس کے عالمی سطح پر موجود سابق طلبہ کے درمیان تعاون کے امکانات پر بھی تبادلہ خیال کیا۔

تقریب خوشگوار ماحول میں جاری رہی، جہاں شرکاء نے ایک دوسرے سے ملاقات کی اور اپنی مادرِ علمی سے وابستہ یادیں اور تجربات بھی شیئر کیے۔ میٹ اینڈ گریٹ نے این ای ڈی یونیورسٹی کے سابق طلبہ کو ایک پلیٹ فارم پر جمع کرنے کے ساتھ ساتھ پاکستان اور امریکہ کے درمیان تعلیمی و پیشہ ورانہ روابط کو مزید مضبوط بنانے کی اہمیت کو بھی اجاگر کیا۔




