سیلاب زدگان کے نام ہیوسٹن کا پیغام ، ہم تمہارے ساتھ ہیں

ہیوسٹن میں مقیم پاکستانی نژاد برادری اور مختلف رفاہی شراکت دار اداروں نے انسانیت، ہم آہنگی اور اجتماعی ذمہ داری کی شاندار مثال قائم کرتے ہوئے پاکستان میں سن 2025ء کے تباہ کن سیلاب سے متاثرہ خاندانوں کی بحالی کے لیے ایک ملین امریکی ڈالر سے زائد رقم نقد اور اجناس کی صورت میں فراہم کر دی ہے۔ یہ مشترکہ مہم درج ذیل اداروں کے تعاون سے منعقد کی گئی۔الائنس فار ڈیزاسٹر ریلیف، ہیلپنگ ہینڈ فار ریلیف اینڈ ڈیویلپمنٹ ، پاکستان ایسوسی ایشن آف گریٹر ہیوسٹن، ایسوسی ایشن آف فزیشنز آف پاکستانی ڈیسنٹ آف نارتھ امریکہ، ساؤتھ ٹیکساس چیپٹر اور  ہیوسٹن کراچی سسٹر سٹی ایسوسی ایشن۔یہ تمام ادارے مل کر ہیوسٹن کی سخاوت، خیر سگالی اور عالمی انسانی ہم دوستی کا عملی ثبوت بنے ہوئے ہیں، جو پاکستان کے متاثرہ علاقوں میں زندگی کی بحالی اور امید کی تعمیر میں حصہ ڈال رہے ہیں۔ان اجتماعی کاوشوں کے نتائج پیش کرنے، شکرگزاری کے اظہار اور اعتماد سازی کے لیے ایک اثر انگیز اور تشکر تقریب 29 اکتوبر کی شام ہیوسٹن میں ہونے جارہی ہے۔تقریب میں بتایا جائے گا کہ ہیوسٹن کی عوامی شمولیت کے ذریعے پاکستان میں کس طرح زندگیاں تبدیل ہو رہی ہیں، جاری بحالی منصوبوں کی پیش رفت پر روشنی ڈالی جائے گی، جب کہ آئندہ لائحہ عمل پر بھی گفتگو ہوگی۔آرگنائزنگ کمیٹی کے ترجمان کےمطابق  یہ محفل شکرگزاری، شفافیت اور اجتماعی عزم کی علامت ہے۔ ہر شریک فرد اُن لوگوں کے لیے امید کی آواز ہے جو اب بھی از سرِ نو اپنی زندگیاں تعمیر کر رہے ہیں۔ ہم ہیوسٹن کے تمام مکینوں، خاندانوں، احباب اور رفقاء کو دعوت دیتے ہیں کہ وہ ہمارے ساتھ شامل ہوں اور پاکستان کے ساتھ کھڑے ہوں۔