پاکستانی نیوز و انٹرٹینمنٹ چینل کے بینر تلے بننے والی نئی رومانوی فلم "لو گرو” کی شاندار لانچنگ تقریب امریکی شہر ہیوسٹن میں ایک یادگار انداز میں منعقد ہوئی، جہاں پاکستانی فنونِ لطیفہ کے دو درخشاں ستارے ہمایوں سعید اور ماہرہ خان نے اپنی موجودگی سے تقریب کو چار چاند لگا دیے۔
شائقین کی بڑی تعداد نے فلمی دنیا کے ان سپر اسٹارز کا پرتپاک استقبال کیا، اور ان کے ساتھ سیلفیاں لینے اور autographs حاصل کرنے کا خوب موقع بھی پایا۔ تقریب کی میزبانی کے فرائض معروف اور ہر دلعزیز میڈیا پرسن آصف جمال نے نہایت خوش اسلوبی سے نبھائے، جن کی میزبانی نے محفل کو اور بھی دلنشین بنا دیا۔ تقریب کا سب سے پرکشش لمحہ اس وقت آیا جب بڑی اسکرین پر فلم "لو گرو” کا آفیشل ٹریلر پیش کیا گیا۔ ٹریلر نے حاضرین کو اپنے سحر میں جکڑ لیا، اور تالیاں گونج اٹھیں۔ حاضرین کے چہروں پر تجسس، مسکراہٹ اور جوش دیدنی تھا۔ تاہم اصل سرپرائز اس وقت ہوا جب ہمایوں سعید اور ماہرہ خان نے فلم کے مقبول اور دل کو چھو لینے والے گانے "آجا تینوں سیر کراواں آ ہا” پر اسٹیج پر آ کر براہِ راست پرفارم کیا۔ فنکاروں کی بھرپور توانائی، شاندار انداز اور مداحوں سے براہِ راست رابطے نے اس لمحے کو یادگار بنا دیا۔ فضا میں ایک لمحے کو واقعی فلمی جادو چھا گیا۔ تقریب کے دوران ایک انٹرایکٹو سیشن بھی رکھا گیا، جس میں دونوں فنکاروں نے شائقین کے سوالات کے نہایت دلچسپ اور خوشگوار انداز میں جوابات دیے۔ یہ لمحے نہ صرف مداحوں کے لیے خاص بن گئے بلکہ خود فنکاروں نے بھی اپنی خوشی کا اظہار کیا۔ تقریب میں پاکستانی قونصلیٹ جنرل برائے ہیوسٹن آفتاب چوہدری سمیت پاکستانی کمیونٹی کی معروف شخصیات نے بھی شرکت کی، جنہوں نے اس طرح کی ثقافتی سرگرمیوں کو کمیونٹی کے لیے خوش آئند قرار دیا۔ فلم "لو گرو” کو پاکستان بھر میں عیدالاضحیٰ کے موقع پر، 6 جون 2025 کو ریلیز کیا جا رہا ہے۔ فلم کے پروڈیوسرز میں ہمایوں سعید، شہزاد نصیب اور جرجیس سیجا شامل ہیں، جبکہ فلم کی عکس بندی کا زیادہ تر حصہ لندن کے خوبصورت اور دلکش مناظر میں کیا گیا ہے، جو فلم کی کہانی میں مزید جاذبیت کا رنگ بھرے گا۔ "لو گرو” نہ صرف ایک فلم ہے، بلکہ محبت، موسیقی، اور مہارت کا وہ امتزاج ہے جو ناظرین کے دلوں میں دیرپا اثر چھوڑنے کی مکمل صلاحیت رکھتا ہے۔
تصاویر بشکریہ امریکن اردو ڈاٹ ٹی وی
