ہیوسٹن: ریاست ٹیکساس کے اسٹیٹ ریپریزنٹیٹو ڈاکٹر سلیمان لالانی کی دوبارہ انتخابی مہم کے سلسلے میں مسٹر و مسز عبدالرحمٰن پٹیل کی رہائش گاہ پر میٹ اینڈ گریٹ اور عشائیے کا اہتمام کیا گیا، جس میں ڈاکٹر سلیمان لالانی کے ووٹرز، حامیوں اور کمیونٹی کے افراد نے شرکت کی۔ تقریب کے دوران شرکاء نے انتخابی مہم میں بھرپور حصہ لینے اور عوام تک امیدوار کا پیغام پہنچانے کے عزم کا اظہار کیا۔
تقریب میں انتخابی مہم کے مختلف پہلوؤں پر گفتگو کی گئی، جن میں گھر گھر جا کر ووٹرز سے رابطہ کرنا، انتخابی تشہیری کارڈز تقسیم کرنا، گھروں کے باہر انتخابی سائنز لگانا اور ذاتی رابطوں کے ذریعے ڈاکٹر سلیمان لالانی کی حمایت میں اضافہ کرنا شامل ہیں۔
شرکاء نے ڈاکٹر سلیمان لالانی کے عوامی خدمات کے ریکارڈ اور ان کے حلقے کے لوگوں سے رابطے کے انداز کو سراہتے ہوئے کہا کہ وہ نرم مزاج، خوش اخلاق اور عوام کے لیے دستیاب رہنے والے نمائندے ہیں۔ ان کے مطابق ڈاکٹر لالانی فون کالز کا عموماً 24 گھنٹوں کے اندر جواب دینے اور لوگوں کے مسائل سننے کی کوشش کرتے ہیں۔
تقریب میں ڈاکٹر زکیہ لالانی کے کردار کو بھی سراہا گیا اور انہیں اپنے شوہر کے لیے معاون اور حوصلہ افزا شریکِ حیات قرار دیا گیا۔ شرکاء نے دونوں میاں بیوی کی سادگی، خوش اخلاقی اور کمیونٹی سے روابط کا ذکر کیا۔
