ہیوسٹن: مسجد حمزہ کے زیرِ اہتمام اسٹیم اینڈ دین پروگرام کے تحت اسٹیم کلاسز کے اختتام پر ایک خصوصی فیملی فیلڈ ٹرپ کا انعقاد کیا گیا، جس میں طلبہ، والدین اور اساتذہ نے شرکت کی۔ فیلڈ ٹرپ کا مقصد بچوں کو کلاس روم کی تعلیم کے ساتھ عملی اور تفریحی انداز میں سائنس، ٹیکنالوجی، انجینئرنگ اور ریاضی کے تصورات سے روشناس کرانا تھا۔
لون اسٹار فلائٹ میوزیم میں بچوں نے تاریخی طیاروں، ہوائی جہازوں کے انجنوں اور جدید فلائٹ ٹیکنالوجی کا قریب سے مشاہدہ کیا۔ طلبہ کو بتایا گیا کہ ہوائی جہاز کس طرح پرواز کرتے ہیں اور ہوابازی کے شعبے میں اسٹیم مضامین کس طرح اہم کردار ادا کرتے ہیں۔
فیلڈ ٹرپ کے دوران بچوں نے مختلف طیاروں اور ان کے نظام کے بارے میں معلومات حاصل کیں جبکہ عملی مشاہدے کے ذریعے سائنس اور ٹیکنالوجی کے مختلف پہلوؤں کو سمجھنے کا بھی موقع ملا۔
پروگرام کی کامیابی میں مسجد حمزہ کے رضاکاروں نے بھی اہم کردار ادا کیا۔ منتظمین نے فیلڈ ٹرپ کے انتظامات، طلبہ کی رہنمائی اور پروگرام کو کامیاب بنانے کے لیے رضاکاروں کی محنت اور خدمات کو سراہا۔
شرکاء نے فیلڈ ٹرپ کو بچوں کے لیے ایک مفید، معلوماتی اور تفریحی سرگرمی قرار دیتے ہوئے کہا کہ اس موقع پر بچوں نے نہ صرف خوبصورت یادیں حاصل کیں بلکہ عملی تجربے کے ذریعے نئی معلومات بھی سیکھیں۔
مسجد حمزہ کی انتظامیہ نے اس عزم کا اظہار کیا کہ بچوں کی دینی تربیت کے ساتھ ساتھ انہیں جدید سائنس، ٹیکنالوجی اور تعلیمی سرگرمیوں سے جوڑنے کے لیے آئندہ بھی اسٹیم اینڈ دین جیسے پروگرام جاری رکھے جائیں گے۔
