ہیوسٹن: ہیوسٹن کی مقامی قیادت اور مذہبی و کمیونٹی نمائندوں کے درمیان رابطے کو مزید مضبوط بنانے کے لیے منسٹرز ایڈوائزری بورڈ ٹو دی میئر کا اجلاس منعقد ہوا، جس میں میئر جان وٹمائر، سٹی کنٹرولر کرس ہولنز اور سٹی کونسل ممبر ٹفنی ڈی تھامس نے خصوصی مہمانوں کے طور پر شرکت کی۔
سٹی کونسل ممبر ڈیوس کی جانب سے 2024 میں اپنے پہلے سالِ عہدہ کے دوران دوبارہ فعال کیے گئے اس بورڈ کی سرگرمیوں میں مسلسل وسعت آ رہی ہے، جبکہ حالیہ اجلاس میں مقامی قیادت اور کمیونٹی کے درمیان تعاون، رابطے اور باہمی شراکت داری کے مختلف پہلوؤں پر گفتگو کی گئی۔
اجلاس سے خطاب کرتے ہوئے میئر جان وٹمائر، کرس ہولنز اور ٹفنی ڈی تھامس نے بورڈ کے ارکان کے ساتھ مختلف امور پر تبادلہ خیال کیا اور کمیونٹی کے ساتھ مؤثر رابطے کی اہمیت کو اجاگر کیا۔
اس موقع پر منتخب نمائندوں اور ان کے اسٹاف کا بورڈ کے اجلاس میں شرکت اور وقت دینے پر شکریہ ادا کیا گیا، بورڈ کی جانب سے ہیوسٹن پبلک لائبریری کی ڈائریکٹر سینڈی گا اور ان کی ٹیم کی مسلسل معاونت کو بھی سراہا گیا۔ بورڈ کے اجلاس سنٹرل لائبریری میں منعقد ہوتے ہیں، جہاں لائبریری انتظامیہ کی جانب سے مسلسل تعاون فراہم کیا جا رہا ہے۔
