ہیوسٹن میں پاکستانی فلمی ہیرو وحید مراد کی 42 ویں برسی پر مداحوں نے ان کی یاد میں خصوصی تقریب کا انعقاد کر کے نہ صرف ان کے فن و شخصیت کو خراجِ عقیدت پیش کیا بلکہ ان کی کامیاب زندگی کا جشن بھی منایا گیا۔ یہ یادگار تقریب لیکسی پوائنٹ ہیوسٹن کے ایک ہال میں منعقد ہوئی جس کا اہتمام معروف کمیونٹی لیڈر سراج نارسی اور میڈیا پرسن ذیشان اکرم مرزا نے کیا۔
تقریب میں مداحوں، فنون لطیفہ سے وابستہ شخصیات اور کمیونٹی کے اہم افراد نے شرکت کی اور وحید مراد کے دور اور ان کے نمایاں کام کو یاد کرتے ہوئے دل سے خراجِ عقیدت پیش کیا۔ مرحوم کے فرزند عادل مراد نے بھی پروگرام میں شرکت کی اور خطاب کرتے ہوئے کہا کہ "وحید مراد کا فن، انداز اور شخصیت آج بھی لوگوں کے دلوں میں زندہ ہیں۔ 42 سال گزر جانے کے باوجود دنیا بھر میں جس طرح انہیں یاد رکھا جا رہا ہے، وہ فن کی دنیا میں اپنی مثال آپ ہیں۔” انہوں نے تمام شرکاء کا شکریہ ادا کیا جنہوں نے محبت اور احترام کے ساتھ اس دن کو یادگار بنایا۔
اس موقع پر سراج نارسی، غضنفر ہاشمی، جمی فالی، رشید فاروقی، شاہ غزالی، طارق منہاس، یاسمین اکمل، نزہت حسین، مسعود احمد، سعید گدی، اور عاصم ترمذی سمیت دیگر افراد نے بھی اپنے خیالات کا اظہار کیا۔ تقریب کا آغاز ذیشان مرزا نے حاضرین کے ساتھ مرحوم کے ایصالِ ثواب کے لیے سورۃ الفاتحہ پڑھ کر کیا اور تمام مہمانوں کا خیرمقدم کیا۔ آخر میں سراج نارسی نے شرکاء کا شکریہ ادا کیا اور لیکسی پوائنٹ کے شاہد ہاشمی کے تعاون کو خصوصی طور پر سراہا۔تقریب کا سب سے یادگار پہلو یہ تھا کہ وحید مراد کے مشہور نغمات نہ صرف تصویری شکل میں ٹی وی پر دکھائے گئے بلکہ ہیوسٹن کے سلیم تجانی اور ندیم اشرفی کی ٹیم نے نغمات پیش کر کے محفل کو مزید جادوئی اور یادگار بنا دیا۔
تصاویر بشکریہ : امریکن اردو ڈاٹ ٹی وی
