ہیوسٹن: پاکستان کی قومی اسمبلی کی پارلیمانی کمیٹی برائے کشمیر کے سربراہ رانا قاسم محمد نون کے اعزاز میں ہیوسٹن میں قونصل جنرل آفتاب چودھری اور ممتاز ڈیموکریٹک رہنما طاہر جاوید کی جانب سے استقبالیہ دیا گیا۔ اس موقع پر مسئلہ کشمیر، اقوام متحدہ کی قراردادوں اور مقبوضہ کشمیر کی تازہ ترین صورتحال کے حوالے سے ایک پینل ڈسکشن کا بھی اہتمام کیا گیا، جس میں مختلف سیاسی اور سماجی شخصیات نے شرکت کی۔
پینل ڈسکشن میں رانا قاسم محمد نون، قونصل جنرل آفتاب چودھری، ممتاز ڈیموکریٹک رہنما طاہر جاوید، کشمیر کمیٹی کی چیئرپرسن غزالہ حبیب اور معروف ادیب و صحافی غضنفر ہاشمی نے حصہ لیا۔ مقررین نے مسئلہ کشمیر کے مختلف پہلوؤں، عالمی سطح پر اس معاملے کو اجاگر کرنے اور کشمیری عوام کی امنگوں کی ترجمانی کے حوالے سے اپنے خیالات کا اظہار کیا۔

اس موقع پر رانا قاسم محمد نون نے کہا کہ اقوام متحدہ کے اجلاس میں وزیراعظم پاکستان شہباز شریف نے اپنے مدبرانہ خطاب کے ذریعے عالمی برادری کو واضح پیغام دیا ہے کہ مسئلہ کشمیر کو اقوام متحدہ کی قراردادوں کے مطابق حل کیے بغیر خطے میں پائیدار امن کا قیام ممکن نہیں۔ انہوں نے مسئلہ کشمیر کے منصفانہ حل کے لیے عالمی برادری کی توجہ اور کردار کی اہمیت پر زور دیا۔
میزبان طاہر جاوید نے کہا کہ رانا قاسم محمد نون کی ہیوسٹن آمد اور ان کے ساتھ ہونے والی گفتگو کے ذریعے پاکستانی امریکی کمیونٹی کو اقوام متحدہ میں مسئلہ کشمیر کے حوالے سے ہونے والی پیش رفت اور مقبوضہ کشمیر کی تازہ ترین صورتحال سے آگاہی حاصل ہوئی۔ انہوں نے اس نوعیت کے مکالموں کو اہم قرار دیا، جو کمیونٹی کو قومی اور بین الاقوامی امور سے باخبر رکھنے میں معاون ثابت ہوتے ہیں۔

کشمیر کمیٹی کی چیئرپرسن غزالہ حبیب نے کہا کہ رانا قاسم محمد نون کی صدارت میں کشمیر کانفرنس کے انعقاد کے ذریعے یہ پیغام دیا گیا کہ امریکہ بھر میں آباد کشمیری مسئلہ کشمیر کا حل اقوام متحدہ کی قراردادوں کے مطابق چاہتے ہیں۔ انہوں نے مسئلہ کشمیر کو عالمی سطح پر اجاگر کرنے اور کشمیری عوام کے مؤقف کو مؤثر انداز میں پیش کرنے کی اہمیت پر بھی زور دیا۔
تقریب میں مسئلہ کشمیر کے حوالے سے تبادلۂ خیال کے ساتھ ساتھ پاکستانی امریکی کمیونٹی کو اہم قومی و بین الاقوامی امور پر براہِ راست معلومات حاصل کرنے کا موقع ملا۔ اس موقع پر مسئلہ کشمیر کے پُرامن اور منصفانہ حل کے لیے عالمی سطح پر مسلسل توجہ اور مؤثر سفارتی کوششوں کی ضرورت کو اجاگر کیا گیا۔
تصویر کا کریڈٹ: کامران جیلانی




