ہیوسٹن میں ” جناح لائبریری” کا شاندار افتتاح

قائد اعطم فاؤنڈیشن یو ایس اے کے زیراہتمام ” جناح لائبریری” کے افتتاحی تقریب کا اہتمام ہوا۔ اس تقریب کو سجانے میں قائد اعظم فاؤنڈیشن کے چیئرمین ڈاکٹر آصف ریاض قدیر نے کیا۔ اس موقع پر فاؤنڈیشن کے پیٹرن انچیف ائیرکموڈور ( ر) خالد چشتی نے قائد اعظم کی سوانح حیات پر خصوصی لیکچر دیا۔ تقریب میں ہوسٹن میں پاکستانی قونصل جنرل آفتاب چوہدری، رکن کانگریس سلوسٹر ٹرنر، سلمان لالانی، قائد اعظم فاؤنڈیشن کے صدر طاہر بھٹی ، ہیوسٹن کراچی سسٹر ایسوسی ایشن کے صدر سعید شیخ اور سراج نارسی نے بھی بطور خاص شرکت کی۔ اس کے علاوہ ممتاز اساتذہ، اسکالرز، کمیونٹی رہنما، اور تعلیمی ترقی کے حامی بھی تقریب میں شریک ہوئے۔ یہ نئی لائبریری بابائے قوم، قائداعظم محمد علی جناح کے وژن اور ورثے کو خراجِ تحسین پیش کرتی ہے اور علم و دانش کے فروغ کے لیے ایک نمایاں سنگِ میل ثابت ہوگی۔ جناح لائبریری کو تعلیم و تحقیق کے مرکز کے طور پر تصور کیا گیا ہے، جہاں طلبہ، محققین اور علم کے متلاشی افراد کے لیے قیمتی وسائل دستیاب ہوں گے۔ لائبریری نا صرف کتابوں اور تحقیقی مواد کی فراہمی کا ذریعہ ہوگی بلکہ یہ کمیونٹی کی علمی اور فکری ترقی کا بھی اہم پلیٹ فارم ثابت ہوگی۔ اس موقع پر قائداعظم فاؤنڈیشن یو ایس اے کا عزم تھا کہ وہ اس نوعیت کے منصوبے دوسرے شہروں میں قائم کریں گے۔ درحقیقت قائداعظم فاؤنڈیشن یو ایس اے نے اس منصوبے کے ذریعے ایک بار پھر یہ ثابت کیا ہے کہ وہ تعلیم، اتحاد اور روشنی کے فروغ کے لیے بانی پاکستان کے نظریات پر کاربند ہے۔ یہ لائبریری مستقبل کے رہنماؤں کو علم کے زیور سے آراستہ کرے گی، اور قائد اعظم کے اس خواب کو حقیقت میں بدلے گی جس میں ایک پڑھا لکھا، مضبوط اور باشعور معاشرہ تشکیل دیا جا سکے۔ مہمانوں کا کہنا تھا کہ یہ مرکز نا صرف پاکستانی نژاد امریکیوں بلکہ تمام علمی و تحقیقی شعبوں سے وابستہ افراد کے لیے ایک قیمتی اثاثہ ثابت ہوگا، جہاں علم کے چراغ ہمیشہ روشن رہیں گے۔