پاکستان ایسوسی ایشن آف گریٹر ہیوسٹن کے سال 2026ء تا 2028ء کے انتخابات میں دل دل پاکستان گروپ کے پورے پینل کی بلامقابلہ کامیابی کے امکانات روشن ہوگئے ہیں۔ تاحال کسی دوسرے گروپ یا امیدوار کی جانب سے مقابلے میں آنے کا فیصلہ سامنے نہیں آیا۔ تاہم امیدواروں کی حتمی حیثیت اور بلامقابلہ کامیابی کا باضابطہ اعلان الیکشن کمیٹی کی جانچ پڑتال اور انتخابی کارروائی مکمل ہونے کے بعد کیا جائے گا۔
پی اے جی ایچ کی الیکشن کمیٹی نے آئندہ دو سالہ مدت کے لیے صدر، سیکریٹری جنرل، ڈائریکٹر ایجوکیشن، ڈائریکٹر ثقافت و مذہبی امور اور ڈائریکٹر نشر و اشاعت کی نشستوں پر انتخابات کے لیے امیدواروں سے کاغذات نامزدگی وصول کر لیے ہیں۔
دل دل پاکستان گروپ کی جانب سے پانچ اہم عہدوں کے لیے درج ذیل امیدواروں نے اپنے کاغذات نامزدگی جمع کرائے ہیں:
شاہد جاوید ہاشمی — امیدوار برائے صدر
امتیاز احسن — امیدوار برائے سیکریٹری جنرل
فیصل عزیز خان — امیدوار برائے ڈائریکٹر ایجوکیشن
خرم زئی — امیدوار برائے ڈائریکٹر ثقافت و مذہبی امور
نصرت حارث — امیدوار برائے ڈائریکٹر نشر و اشاعت
الیکشن کمیٹی کے چیئرمین دانش علی احمد نے کمیٹی کے اراکین امجد قائم خانی، محمد صادق خان، خضر پٹھان اور شہزاد احمد کے ہمراہ امیدواروں کے کاغذات نامزدگی وصول کیے۔
الیکشن کمیٹی اب جمع کرائے گئے کاغذات نامزدگی کی جانچ پڑتال (اسکروٹنی) کے بعد امیدواروں کی حتمی فہرست جاری کرے گی اور انتخابی عمل کے اگلے مراحل سے متعلق باضابطہ اعلان کیا جائے گا۔
تاحال کسی متبادل پینل کے میدان میں نہ آنے کے باعث دل دل پاکستان گروپ پانچوں نشستوں پر بلامقابلہ کامیابی کی پوزیشن میں دکھائی دیتا ہے۔ تاہم اس حوالے سے حتمی فیصلہ اور باضابطہ اعلان الیکشن کمیٹی ہی کرے گی۔
پی اے جی ایچ ہیوسٹن کی پاکستانی امریکن کمیونٹی کی ایک اہم نمائندہ تنظیم ہے، جو پاکستانی ثقافت، قومی ورثے، تعلیم، سماجی سرگرمیوں اور کمیونٹی کے مختلف طبقات کو ایک پلیٹ فارم پر متحد کرنے میں اپنا کردار ادا کرتی ہے۔
2026ء تا 2028ء کی نئی قیادت کے انتخاب کو ہیوسٹن کی پاکستانی کمیونٹی میں خاص اہمیت حاصل ہے۔ اب تمام نظریں الیکشن کمیٹی کی اسکروٹنی، امیدواروں کی حتمی فہرست اور بلامقابلہ کامیابی کے باضابطہ اعلان پر مرکوز ہیں۔
