ہیوسٹن: معروف شاعرہ فرح اقبال کی جانب سے ایک خوبصورت ادبی و سماجی شام کا اہتمام کیا گیا، جس میں ملاقاتوں، پرتکلف عشائیے اور اردو شاعری کی دلنشیں محفل نے شرکاء کو خوشگوار ادبی ماحول فراہم کیا۔
تقریب کے مہمانانِ خصوصی میں اسلام آباد، پاکستان سے تشریف لائے معروف ادبی شخصیت قیوم طاہر اور فلوریڈا سے نظر نقوی شامل تھے، جن کی شرکت نے محفل کی رونق اور وقار میں اضافہ کیا۔
اس موقع پر ڈاکٹر یاسمین قریشی، فہیم اخوند، عارف عظیم، رفیق سوداگر، باسط جلیلی، سائرہ اعجاز اور ناہید سوداگر سمیت مختلف شعبہ ہائے زندگی سے تعلق رکھنے والی شخصیات نے شرکت کی۔ شرکاء نے باہمی ملاقاتوں اور خوشگوار گفتگو کے بعد عشائیے سے لطف اندوز ہوئے، جبکہ بعد ازاں منعقدہ محفلِ مشاعرہ میں اردو شاعری اور شعر و سخن سے اپنی دلچسپی کا اظہار کیا۔
تقریب کی میزبان فرح اقبال نے تمام مہمانوں، بالخصوص خصوصی شخصیات اور میڈیا نمائندگان کا شکریہ ادا کرتے ہوئے کہا کہ احباب کی محبت، شرکت اور تعاون نے اس شام کو یادگار بنا دیا۔
یہ ادبی محفل باہمی محبت، خلوص اور اردو زبان و ادب سے وابستگی کا خوبصورت اظہار ثابت ہوئی۔
